А.Раҳмон: «Дониши журналистони ҷавони телевизион ҷавобгӯи талаботи имрӯза нест»

Душанбе,  09.01.2015. (АМИТ «Ховар»,  Марҳабои  Азамат).- «Имрӯз  масъалаи  кифоят  накардани  журналистони  боистеъдоду  касбии   низоми Кумитаи   телевизион  ва  радиои  назди Ҳукумати  Ҷумҳурии  Тоҷикистон  ҳанӯз  ҳам масъалаи доғи рӯз  аст»,  — гуфт  ҷавобан  ба саволи  журналист раиси  кумитаи  мазкур  Асадулло  Раҳмон дар  нишасти  матбуотӣ, ки  имрӯз, 9  январ,  дар  шаҳри  Душанбе баргузор  гардид.
Асадулло  Раҳмон  гуфт, ки донишу  малакаҳои  хатмкунандагони  факултаҳои  журналистикаи  донишкадаҳои олии  Тоҷикистон  на  ҳамеша ҷавобгӯи  талаботи  имрӯзаанд. «Омӯзгорон  аксаран  ба  онҳо  донишҳои  назариявиро   талқин  менамоянд, вале донишҳо барои  истифодаи  технологияҳои нав  дар  ин  бахш  кифоят  намекунад. Мо  дар  ҷараёни  кор  журналистони  ҷавонро ба  кормандони  бештар таҷрибадор  вобаста  карда, онҳоро таълим  медиҳем,  вале  мушкилоти  кадрҳо  аз  қабили ҳам  журналистон  ва  ҳам  коргардонҳои  ҳамаи  шабакаҳои телевизион  ҳанӯз  ҳам  ҳис  карда  мешавад»,  —  гуфт  мавсуф.