Афзоиши маҳсулоти растанипарварӣ ва чорводорӣ

Душанбе, 24.01.2015. (АМИТ “Ховар”, Ситораи Боймурод).- Ба иттилои Агентии омори назди Президенти Ҷумҳурии Тоҷикистон ҳаҷми маҷмӯи маҳсулоти кишоварзӣ дар соли 2014 дар ҳамаи категорияҳои хоҷагӣ 21021,9 млн. сомониро ташкил дод. Нисбат ба ҳамин давраи соли 2013 бо нархҳои муқоисавӣ 4,5 фоиз, аз ҷумла ҳаҷми маҳсулоти растанипарварӣ 14532,8млн. сомонӣ ё 0,9 фоиз зиёд ва чорводорӣ 6489,1 млн. сомонӣ 12,5 фоиз зиёд шудааст.
Гуфта мешавад, ки дар соли 2014 дар ҳамаи категорияҳои хоҷагӣ 1549469 тонна сабзавот, 545692 тонна полизӣ, 342131 тонна мева, 188840 тонна ангур истеҳсол шудааст, ки нисбат ба соли 2013 сабзавот 4,0 фоиз полизӣ 10,2 фоиз, мева 4,2 фоиз, ангур 7,7 фоиз зиёд мебошад. Ғалладона дар ҳаҷми 1317814 тонна, пахта 372654 тонна, картошка 853714 тонна истеҳсол  шудааст, ки нисбат ба соли 2013 ғалладона 5,4 фоиз, пахта 5,1 фоиз ва картошка 23,5 фоиз кам мебошад.