Б. Шукурзода «Муроҷиати шаҳрвандон-омили поксозии бозорҳо»

Душанбе, 09.01.2015. (АМИТ «Ховар», Бекназари Абӯбакр). — «Масъалаи баррасии саривақтии арзу шикоятҳои истеъмолкунандагон дар Агентии «Тоҷикстандарт» зери назорати доимии роҳбарият қарор дошта, ҳамеша талош мешвад, ки онҳо ҳалли мусбати худро ёбанд», — гуфт 9 январ дар нишасти матбуотӣ директори Агентии стандартизатсия, метрология, сертификатсия ва нозироти савдо Бахтиёр Шукурзода. 
Ӯ таъкид намуд, ки масъалаи ҳимояи ҳуқуқи истеъмолкунандагон аз самтҳои муҳими фаъолияти агентӣ буда, ба он диққати махсус дода мешавад, чунки танҳо бо назорати давлатӣ пурра тоза нигоҳ доштани бозори истеъмолӣ аз молу маҳсулоти пастсифат ва ё ғайристандартӣ имконнопазир аст. Аз ин рӯ, муроҷиати ҳарчи бештари истеъмолкунандагон раванди назорати воридот ва истеҳсоли молу маҳсулотро такони тоза бахшида, ба тоза намудани бозорҳо ва марказҳову нуқтаҳои савдо мусоидати амиқ мекунад.
Маврид ба зикр аст, ки соли 2014 барои риоя накардани қоидаҳои савдо, талаботи ҳуҷҷатҳои меъёрии техникӣ, истифодаи воситаҳои ченаки корношоям, воридоту истеҳсол ва фурӯши маҳсулоти ғайристандартӣ ва риоя накардани ҳуқуқҳои истеъмолкунандагон дар 2 ҳазору 988 ҳолат шахсони ҳуқуқӣ ва воқеӣ ба маблағи 717 ҳазору 660 сомонӣ ҷарима  шуда, ин маблағҳо ба буҷаи давлат ирсол гардиданд.