Барномаи иктишофоти геологӣ баробари 9 миллион сомонӣ иҷро шуд

Душанбе,  06.01.2015. (АМИТ «Ховар»,  Кристина Эрлих).- Геологҳои  Тоҷикистон  тайи  соли 2014 аз  ҳисоби  буҷети  давлатӣ  корҳои  гуногунро  ба  маблағи 9  миллион  сомонӣ иҷро  намуданд. Дар  ҳамин  давра   корҳои  шартномавӣ  аз  рӯи  160  лоиҳа  ба  маблағи  12  миллиону 176 ҳазор  сомонӣ  ва  корҳои  пудратӣ  ба  маблағи 17  ҳазору  852  сомонӣ иҷро гардида, суръати  афзоиш 112 — фоизро ташкил  дод.
Сардори  Сарраёсати геологияи  назди Ҳукумати  ҶТ  Мурод  Хол Ҷумъазод  имрӯз, 6  январ,  дар нишасти  матбуотӣ  аз  рӯи  натиҷаи  фаъолият  тайи  соли  2014  дар  ин  бора  хабар  дод.
Дар  ҷараёни  нишасти  матбуотӣ  ҳамчунин  зикр  шуд, ки  ниҳодҳои  сохторҳои   Сарраёсати   геологияи  Тоҷикистон  дар  давраи  ҳисобот  пармакориро  дар  ҳаҷми  9 ҳазору  946  метри  тӯлонӣ  иҷро  намуданд. 
«Сарраёсати  геология  ба  манзури  ҷалби сармояҳо, вусъат  бахшидани  иктишофоти  геологӣ ва  бунёди  корхонаҳои нави  дорои  таҷҳизоти  муосири технологӣ  бо  22  ширкати  дохилию  хориҷӣ  ҳамкорӣ  менамояд», —  гуфт  дар  хотима сардори  Сарраёсати  геологияи  Тоҷикистон.