Баррасии вазъи кунунӣ ва дурнамои мусиқии касбӣ

Душанбе, 13.01.2015. (АМИТ «Ховар»). — 14 январ бо ташаббуси Иттифоқи композиторони Тоҷикистон дар Донишгоҳи давлатии Хуҷанд ба номи академик Бобоҷон Ғафуров конфронси илмию амалӣ оид ба рушди мусуқии касбӣ, мушкилоти вазъи кунунӣ ва дурнамои густариши соҳа доир мегардад. Дар конфронс олимону донишмандони соҳа, роҳбарони макотиби мусиқӣ ва донишҷӯён иштирок менамоянд. 
Раиси  Иттифоқи компазиторони Тоҷикистон Қудратулло Ҳикматов ба мухбири АМИТ «Ховар» иттилоъ дод, ки дар конфронси мазкур олимону донишмандони соҳа доир ба таърих, вазъи кунунӣ ва дурнамои рушди соҳа маърӯза намуда, роҳҳои ҳалли мушкилоти ҷойдошта ва густариши минбаъдаи соҳаро баррасӣ менамоянд. 
«Ҳадафи аслии доир намудани ин конфронс баррасии мушкилоти кунунии соҳа, аз ҷумла истифодаи мусиқии дигар миллатҳо аз ҷониби санъаткорони ҷавон, сурудани матнҳои бемантиқу пастмазмун аз тарафи баъзе сарояндаҳо ва амсоли инҳо аст. Мо талош дорем, ки бо истифода аз мусиқии асили тоҷикӣ ва дар ҳамкорӣ бо шоирону композиторон сурудҳои сарояндагон таҳия гарданд, то ки санъати солиму асил ба мардум пешкаш гардад. Чунки ин раванд, албатта, ба шавқу завқ ва сатҳи маърифати мардум, бахусус насли наврасу ҷавон таъсири амиқ мегузорад», — муътақид аст Қ. Ҳикматов.
Маврид ба ёдоварист, ки дар бахши дуюми конфронси мазкур консерт бо иштироки устодони санъат, ҳунармандон ва донишҷӯёни вилояти Суғд дар назар аст.