Боздошти 160 кг маводи нашъаовар аз гардиши ғайриқонунӣ

Хуҷанд, 15.01.2015. (АМИТ “Ховар”, Абдуаҳад Шарифзода).-Дар соли 2014 дар шимоли кишвар аз гардиши ғайриқонунӣ 159 кг 471 грамм маводи нашъаовар мусодира шуд, ки 11 кг 615 грамми он воситаи нашъаовари героин, 23 кг 400 грамм маводи афюн ва 124 кг 456 грамм маводи гурӯҳи бангдона мебошад. 
Чунин  маълумот зимни баргузории нишасти матбуотӣ аз ҷониби сардори Раёсати Агентии назорати маводи нашъаовари назди Президенти ҶТ дар вилояти Суғд Музаффар Муҳаммад Ҳотамӣ зикр ёфт. Ҳамзамон зикр шуд, ки дар давраи ҳисоботӣ дар самти мубориза бо муомилоти ғайриқонунии маводи нашъаовар дар натиҷаи чорабиниҳои фаврию ҷустуҷӯии амалишуда 44 ҷиноят низ ошкор  шуд, ки он нисбат ба соли 2013 12 адад зиёд мебошад.  
Ба иттилои сардори агентии мазкур, инчунин барои содир кардани ҷиноятҳои нашъаҷаллобӣ ба 233 нафар дар ин давра  ҷавобгарии ҷиноятӣ кашида шуд, ки аз он 230 нафар мард, 3 нафар зан, 2 нафар ноболиғ ва 17 нафар шахси пеш судшуда мебошад.
Ғайр аз ин, дар давраи ҳисоботӣ аз ҷониби мақомоти ҳифзи ҳуқуқ ва сохторҳои низомии вилоят  222 ҷинояти нашъаҷаллобӣ ошкор ва аз гардиши ғайриқонунӣ  609 кг 699 грамм маводи нашъаовар мусодира шуданд, — илова намуд манбаъ.