Даъвати С.Тағойзода ба хизмати софдилона

Душанбе, 12.01.2015. (АМИТ «Ховар», Лайло Тоирӣ).-Ҷаласаи ҳайати мушовараи Вазорати меҳнат, муҳоҷират ва шуғли аҳолии Ҷумҳурии Тоҷикистон доир ба ҷамъбасти фаъолият дар соли 2014 ва вазифаҳо барои соли 2015 бо иштироки муовини Сарвазири Ҷумҳурии Тоҷикистон Марҳабо Ҷабборӣ рӯзи 9 январ баргузор гардид. Вазири меҳнат, муҳоҷират ва шуғли аҳолии ҶТ Сумангул Тағойзода оид ба ҷамъбасти фаъолияти вазорат дар соли 2014 маърӯза намуд.
Бино ба иттилои  Шуъбаи муносибатҳои байналмилалӣ ва робита бо ҷомеаи вазорат,  дар ҷамъбасти фаъолият  масъалаҳои сатҳи зиндагии аҳолӣ, музди меҳнат ва омилҳои таъсиррасонии он, хароҷоти пулӣ ва амонатҳои аҳолӣ дар соли 2014, танзими равандҳои муҳоҷирати аҳолӣ дар дохил ва хориҷи кишвар, маълумоти баҳисобгирии рафту омади шаҳрвандон, муҳоҷирони дохилӣ ва экологӣ, омӯзиш ва бозомӯзии касбӣ ва бо кор таъминкунии хатмкунандагони муассисаҳои таълими касбӣ, таҳсилоти ибтидоии касбӣ ва таълими калонсолон, самти ташкил ва рушди ҳамкориҳои байналмилалии соҳавӣ бо ташкилотҳои байналмилалӣ, инчунин оид ба муроҷиат ва қабули шаҳрвандон изҳори назар намуда, ҷиҳати бартараф намудани камбудиҳои ҷойдошта супоришҳои махсус дод.
Муовини Сарвазири Ҷумҳурии Тоҷикистон Марҳабо Ҷабборӣ оид ба дастовардҳои ноилгардида дар соли 2014 ва мушкилоти мавҷуда сухан гуфта, барои ҳалли онҳо дастуру супоришҳои мушаххас дод.
Вазири меҳнат, муҳоҷират ва шуғли аҳолии ҶТ Тағойзода Сумангул Саид неруи созандаи кадрии вазоратро ба хизмати софдилона даъват карда, гуфт, ки ҷиҳати дар амал татбиқ намудани стратегияву барномаҳои давлатӣ кушишҳо ба харҷ диҳанд.