Э. Раҳмон: Дар роҳи пешрафти кишвар мушкилот боқӣ мондаанд

Душанбе, 23.01.2015. (АМИТ «Ховар», Лайло Тоирӣ).- «Дар доираи татбиқи «Стратегияи миллии рушд барои давраи то соли 2015» бо азму талоши Ҳукумат, шарикони рушд ва заҳмати софдилонаи мардуми шарифи Тоҷикистон бисёр масъалаҳои иқтисодиву иҷтимоӣ пурра ё қисман ҳал  шудаанд»,-таъкид дошт Президенти мамлакат Эмомалӣ Раҳмон имрӯз, 23 январ зимни Паёми худ ба Маҷлиси Олии Ҷумҳурии Тоҷикистон.
Дар баробари ин, бо сабаби вақт ва захираҳои зиёдро талаб кардани ҳалли баъзе масъалаҳо ва мавҷудияти монеаҳои муайян дар ин самт, инчунин вобаста ба вазъи зудтағйирёбандаи минтақа ва ҷаҳон ҳоло ҳам дар роҳи пешрафти кишвар як силсила мушкилот боқӣ мондаанд.
«Мо бояд сиёсати иқтисодии худро тарзе ба роҳ монем, ки тавассути истифодаи самараноки захираву имкониятҳои мавҷуда ва дигар дороиҳо рақобатнокии иқтисоди миллӣ баланд бардошта шавад»,-илова намуд Сарвари давлат..
Ҳоло натиҷаҳои «Стратегияи миллии рушд барои давраи то соли 2015» дар сатҳи вазорату идораҳо, вилоятҳо ва шаҳру ноҳияҳо бо ҷалби ҷомеаи шаҳрвандӣ арзёбӣ шуда истодаанд.
Ба гуфтаи Президенти мамлакат Эмомалӣ Раҳмон, моҳи феврали соли ҷорӣ ҳисоботи фосилавии стратегияи зикршударо дар Шӯрои миллии рушди назди Президенти кишвар ва Форуми рушд баррасӣ карда, ҷиҳати таъмин намудани пешрафти босуботи мамлакат барои давраи то соли 2030 силсилаи ташаббусу пешниҳодҳо муҳокима мегарданд.
«Дар иртибот ба ин, бори дигар изҳор медорам, ки ҳамаи захираву имкониятҳои мавҷуда ба ҳалли масъалаҳои ҳифзи фазои орому осудаи зиндагии шаҳрвандон, расидан ба меъёрҳои баландтари некӯаҳволии мардум ва шароити боз ҳам беҳтари иҷтимоӣ, тақвияти қонуният ва адолат ва дар маҷмӯъ, ба таъмини амнияти давлат, шаҳрвандон ва ҷомеа равона мешаванд»,-баён дошт Эмомалӣ Раҳмон.