Хатлон: татбиқи 17 лоиҳаи сармоягузории давлатӣ

Душанбе, 27.01.2015. (АМИТ «Ховар», Мавҷуда Анварӣ).-Аз рӯи ҳисоботи сардори раёсати сармоягузорӣ ва идораи амволи давлатии мақомоти иҷроияи ҳокимияти давлатии вилояти Хатлон С.  Мӯсоев, соли 2014  дар вилоят 17 лоиҳаи  сармоягузории давлатӣ амалӣ гардида, маблағи умумии азхудшуда 398,2 млн. долларро ташкил медиҳад, ки ба соҳаҳои маориф, тандурустӣ, кишоварзӣ, об, ирригатсия, энергетика, нақлиёт, коммуналӣ ва дигар соҳаҳо равона  шудааст.
Аз ҳисоби соҳибкорон  дар ин муддат  дар шаҳру ноҳияҳои вилоят 381 адад биною иншоот ва корхона  ба маблағи 263,5 миллион сомонӣ  мавриди истифода қарор дода шуда, 2536 ҷойи корӣ муҳайё гардид. 
Инчунин  раёсат  дар ҳамкорӣ бо соҳибкорон 94  адад  лоиҳаи сармоягузорӣ  таҳия намуда, барои пайдоиши сарчашмаи сармоягузорӣ  ба Кумитаи давлатии сармоягузорӣ ва идораи амволи давлатии Ҷумҳурии Тоҷикистон пешниҳод  шуданд. Аз ин ҳисоб ба 29 нафар соҳибкор ба маблағи 18, 5 миллион сомонӣ қарзҳои имтиёзнок ҷудо гардида, дигар лоиҳаҳо дар марҳилаи омӯзиш қарор доранд.
Дар ин муддат 22 маротиба музоядаҳо гузаронида шуда, дар онҳо 32 адад биною иншоот, воситаи нақлиёту механизмҳо ва дигар намуди амволи давлатӣ ба маблағи умумии  1 млн 160 ҳазору 275 сомонӣ хусусӣ ва  ғайридавлатӣ гардонида шуда, маблағҳо ба буҷаи мақомоти иҷроияи ҳокимияти давлатии шаҳру ноҳияҳо ворид шудаанд.