ХФМ ФР ба муҳоҷирони меҳнатӣ патент медиҳад

Душанбе,  13.01.2015. (АМИТ «Ховар»,  Лайло  Тоирӣ).- Назар  ба  хабари  сомонаи Хадамоти  муҳоҷирати Вазорати  меҳнат,  муҳоҷират  ва  шуғли  аҳолии  Тоҷикистон,   шуъбаи Хадамоти федералии   муҳоҷирати  Русия  ба додани  патентҳо ба  муҳоҷирони  меҳнатӣ  барои  иҷрои  кор  шуруъ  намуд. 
Мувофиқи  маълумоти Хадамоти  муҳоҷирати  ҶТ,  чунин  ҳуҷҷатҳоро  бояд  шаҳрвандони   давлатҳое гиранд, ки  байни онҳо  ва  Русия  тартиби бераводид ҷорист. Патентҳо  барои онҳое  заруранд, ки ҳангоми  убури  сарҳади  Русия дар  ҳуҷҷатҳояшон калимаи «кор»  — ро ҳамчун мақсади  сафар зикр дода бошанд. Шахси  хориҷӣ  аризаашро  барои   гирифтани  патент бояд  дар  давоми  30  рӯзи  баъди ба  Русия  омаданаш  супорад. Созмонҳо  муҳоҷиронро  дар  асоси   патенти  харидаашон  ба  кор  қабул  карда,   дар  баробари  ин   низоми  квота  лағв  карда  мешавад. 
Ёдовар  мешавем, ки  қонуни  дахлдор  аз  1  январи  соли  ҷорӣ эътибор  пайдо  намуд.
Муҳоҷирони  меҳнатӣ  дар  баробари  харидани  патент  бояд  асосҳои  забони русиро  донанд.  Ғайр  аз  ин  сокинони  аксарияти   кишварҳои  ИДМ  фақат  бо  истифода  аз шиносномаҳои  хориҷӣ ҳуқуқи  ба  Русия рафтанро  доранд.
Маҳдудиятҳои  зикршуда  барои  муҳоҷирони  меҳнатии  кишварҳои  узви  Иттиҳоди  иқтисодии  Авруосиё  лағв  шудааст.  Русия,  Беларус  ва  Қазоқистон аз  1  январ  бозори  ягонаи  меҳнатро ташкил додаанд.