Хизматрасонии хоҷагии манзилию коммуналӣ беҳтар шудааст

Душанбе, 08.01.2015. (АМИТ “Ховар”, Ситораи Боймурод).- Дар соли 2014 корхонаҳои тобеи КВД “Хоҷагии манзилию коммуналӣ” ба маблағи 126 млн 575 ҳазор сомонӣ хизматҳои гуногуни коммуналӣ расониданд, ки нисбат ба соли 2013-ум ба маблағи 17 млн 808 ҳазор сомонӣ ё 16 фоиз афзудааст. Аз маблағи хизматрасонии корхонаҳои соҳа ба суратҳисоби мақомоти андози шаҳру ноҳияҳои ҷумҳурӣ 35 млн. 165 ҳазор сомонӣ пардохт шудааст,- гуфт Алимурод Тағоймуродов, директори генералии  КВД “Хоҷагии манзилию коммуналӣ” имрӯз, 8-уми январ зимни нишасти матбуотии ин ниҳод.
Корхонаҳои соҳаи хоҷагии манзилию коммуналӣ дар давраи ҳисоботӣ ба маблағи 43 млн. 740 ҳазор сомонӣ хизмат расонидаанд, ки нисбат ба соли 2013-ум 14 фоиз зиёд аст.
 Гуфта мешавад, ки дар давраи ҳисоботӣ аз тарафи корхонаҳои коммуналии шаҳру навоҳии ҷумҳурӣ корҳои ободонӣ ва кабудизоркунӣ ба маблағи 29 млн. 347 ҳазор сомонӣ иҷро шуданд, ки 103 фоизи иҷрои нишондодҳои пешбинишуда мебошад. Таъмири фонди асосии манзил ба маблағи 228 ҳазор сомонӣ иҷро шудааст.
Дар мавсими дарахтшинонӣ 58 ҳазор бех дарахти ҳархела шинонида шуд, ки ин 113 фоизи иҷрои нишондиҳандаҳои пешбинишударо ташкил медиҳад. Ҳаҷми умумии кашонидани партовҳо 464 ҳазор метри кубиро ташкил дод, ки 112 фоизи нақшаи пешбинишуда мебошад.