Иҷрои нақша дар ҶСК «Ангишт”- 112%

Хуҷанд, 29.01.2015. (АМИТ “Ховар”,Абдуаҳад Шарифзода).-Дар коргоҳҳои истихроҷи ангишти вилояти Суғд истихроҷи ангишт  сол аз сол зиёд  мегардад. Тавре ки ба “АМИТ Ховар” аз маъмурияти коргоҳи Ҷамъияти саҳомии шакли кушодаи “Ангишт”-и шаҳраки Шӯроби шаҳри Исфара  иттилоъ доданд, ангиштканони ҷомеаи меҳнатии коргоҳи мазкур дар  давоми соли  2014 — 56,2 ҳазор тонна ангишт истихроҷ намуданд, ки ин нишондод нисбат ба нақшаи муқаррар  гардида  6 000 тонна  ва дар қиёс ба ҳамин давраи соли 2013 беш аз 4,500 тонна зиёд буда, дар маҷмӯъ 112%-и нақшаи солонаро ташкил медиҳад. 
Ба иттилои манбаъ, нақбканони коргоҳ  дар  ин давра дар масоҳати 3000  метри тӯлонӣ  корҳои роҳкушоиву нақбканиро  ба анҷом расониданд, ки ин рақам дар муқоиса бо соли қаблӣ 315  метр зиёд мебошад. Дар маҷмӯъ, дар давоми соли гузашта  ҳаҷми истеҳсоли маҳсулот ба 13 млн. 450 ҳазор сомонӣ баробар гардид. 
Бояд зикр намуд, ки дар ҷамъбасти фаъолияти соли 2014 ҶСШК  “Ангишт”-шаҳри Исфара  барои нишондиҳандаҳои хуб дар самти ба раванди истеҳсолот ҷорӣ намудани техникаву технологияҳои нав ва дар ин замина зиёд намудани ҳаҷми истеҳсоли маҳсулот дар миқёси кишвар, корхонаи беҳтарин шинохта шуда, аҳли ҷомеаи ин коргоҳ бо ифтихорномаи Вазорати саноат ва технологияҳои нави ҶТ  сарфароз гардид. Дар ин замина, дар коргоҳ баҳри беҳгардонии раванди кор ва ба ин васила истихроҷи ангишт  соли гузашта, роҳбарияти коргоҳ бо ҷалби мутахассисони дохилии коргоҳ як обкашаки асосии конро пурра аз таъмири асосӣ бароварда, дар ин замина  барои зиёд намудани истихроҷи ангишт ва  сифати он ба маблағи 157 ҳазор сомонӣ ангишткашаки зеризаминии нав харид.
Инчунин баҳри дастрасии саривақтии мардум ба хариди ангишт, бо ташаббуси роҳбарияти коргоҳ дар худуди вилоят 26 нуқтаи ангиштфурӯшӣ ташкил шудааст, ки то имрӯз  наздик ба 55 ҳазор тонна  ангишт ба фурӯш рафтааст, ки нисбат ба соли қаблӣ 10 800 тонна зиёдтар мебошад. 
Хотиррасон мекунем, ки алъон дар миқёси вилояти  Суғд 8 коргоҳи ангиштканӣ фаъолият дорад, ки 3-тои он дар ноҳияи Айнӣ, 2 коргоҳ дар ноҳияи Панҷакент ва Исфара ва 1 коргоҳ дар ноҳияи Кӯҳистони Мастчоҳ ҷойгир аст. 
Аз ин шумора коргоҳҳои ҶСК “Ангишт”- ноҳияи Исфара ва “Фон-Яғноб”-и ноҳияи Айнӣ аз зумраи калонтарин конҳои истихроҷи ангишт дар шимоли кишвар маҳсуб меёбанд.