КВД ХМК: Ҳолати техникаҳои коммуналӣ ташвишовар аст

Душанбе, 08.01.2015. (АМИТ “Ховар”, Ситораи Боймурод).- Ба иттилои КВД “Хоҷагии манзилию коммуналӣ” дар мавриди ташкили гармхона барои парвариши гулу гулбуттаҳо ва дарахтони ороишӣ, ин ниҳод   корхонаҳои соҳаро вазифадор намудааст, ки барои парвариши гулу гулбутта ва ниҳолҳо хоҷагиҳои ёрирасон ташкил намоянд. 
Ба иттилои манбаъ дар соли 2014 масоҳати умумии заминаҳои хоҷагиҳои ёрирасони корхонаҳои коммуналӣ дар миқёси ҷумҳурӣ 45 гектар ва 61 адад гармхона ба масоҳати 8763 метри квадратӣ ташкил шудааст, ки нисбат ба соли гузашта 1603 метри квадратӣ зиёд мебошад.
Ҳолати техникаҳои коммуналӣ ҳанӯз ҳам ташвишовар тасниф мешавад. То 31-уми декабри соли 2014 аз 898 адад шумораи техникаи махсуси коммуналӣ, ки дар мувозинаи корхонаҳои соҳа қарор дорад, 576 адад коршоям ва 322 ададаш корношоям аст ва аз шумораи умумӣ 360 адад муҳлати дуюм ва сеюми хизматрасониро иҷро дорад. Талабот ба техникаҳои махсуси коммуналии корхонаҳои соҳаи хоҷагии манзилию коммуналии шаҳру ноҳияҳои ҷумҳурӣ зиёда аз 900 ададро ташкил медиҳад.