«Марҷона» таъмири Мактаб-интернатро анҷом дод

Душанбе, 6.01.2015.(АМИТ « Ховар», Рафоати Абдулҳамид).- Дар мактаб интернати рақами 1-и деҳаи Арали ҷамоати деҳоти ба номи Миралӣ Маҳмадалиеви ноҳияи Восеъ бо фармоиши дирексияи сохтмонии иншооти ҳукуматии Дастгоҳи иҷроияи президенти Ҷумҳурии Тоҷикистон таъмири асосии биноҳои муассиса ба маблағи 3 миллиону 100 ҳазор сомонӣ ба анҷом расонида шуд. Корҳои сохтмониро ширкати сохтмонии «Марҷона» бо ҷалби беҳтарин сохтмончиёни маҳаллӣ  иҷро намуд. Бинои  мазкур ҳанӯз солҳои 50-уми асри гузашта сохта шуда, дар ҳолати садамавӣ қарор дошт ва баъди таъмиру навсозӣ симои худро дигар карда, мавриди баҳрабардорӣ қарор гирифт.
Дар муассисаи мазкур 34 нафар омӯзгору мураббӣ ба 260 нафар хонанда сабақ медиҳад.
 Дар айни замон тарбиятгирандагон имкон доранд, ки аз ҳаммом, ошхона, толори варзишии замонавӣ ва майдончаҳои варзишӣ истифода намоянд. Мактаб- интернат бо хатти озоди барқ пайваст шуда, синфхонаҳои компютерӣ бо компютеру принтерҳо муҷаҳҳаз  мебошанд.