Муҳоҷирони меҳнатӣ қарзҳояшонро гирифтанд

Душанбе,  05.01.2015. (АМИТ «Ховар», Лайло  Тоирӣ).- Бо  мусоидати Намояндагии  Хадамоти  муҳоҷирати  ҶТ  дар  ФР  ба  муҳоҷирони  меҳнатӣ  қарзҳои  маошашон баробари  24  миллиону 126 ҳазор рубл пардохта  шуданд. 
Тавре  ки   хадамоти  матбуоти  Намояндагии Хадамоти  муҳоҷирати  ҶТ  дар  ФР  хабар  медиҳад, 23  декабри  соли  2014  бо мусоидати Намояндагии  Вазорати  меҳнат,  муҳоҷират ва  шуғли  аҳолии  ҶТ  дар  ФР  оид ба  муҳоҷират,  шаҳрвандони ҶТ  Нурулло Гулҷонов  ва  Садриддин  Олимов, ки дар  ширкати  «ВАРЗ»  кор  мекунанд,  қарзи  маошашонро  дар  ҳаҷми  439  рубл  дастрас  намуданд.  Ғайр  аз  ин  ба  Дӯстмурод  Ҷалилов, ки   дар Ҷамъияти  масъулияташ  маҳдуди  «Объединение» — и ноҳияи  Одинсово  кор  мекунад,  112 ҳазор  рубл  пардохта  шуд. 
Назар  ба гуфтаи  манбаъ,  сабаби  асосии  сар  задани  чунин  ҳодисаҳо  адами  шартномаи  меҳнатӣ бо  корфармо  мебошад. Корфармоён  аксаран  ба  муҳоҷирони  меҳнатӣ  ваъда  медиҳанд, ки  музди  корашон дар  охири  сол  дода  мешавад,  вале  бо  сабабҳои  мухталиф  онҳо  ба ваъдаашон  на  ҳамеша  вафо  мекунанд.