Муҳоҷирони меҳнатӣ дар Русия нафақа мегиранд

Душанбе, 09.01.2015 (АМИТ «Ховар», Лайло Тоирӣ).- Яке аз масъалаҳои ҳалталаб дар самти муҳоҷирати меҳнатӣ- ин бо суғуртаи иҷтимоӣ ва суғуртаи тиббӣ фарогирии муҳоҷирони меҳнатӣ-шаҳрвандони Ҷумҳурии Тоҷикистон дар хориҷа,  интихоб ва ташкили модели беҳтарини суғуртаи иҷтимоӣ ва тиббии  барои муҳоҷирони меҳнатӣ дастрас ва муфид мебошад, ки ин  масъала  ҳанӯз соли 2013 бояд ҳалли худро пайдо мекард. Ин масъаларо 8 январ иштирокчиёни  ҷамъбасти фаъолияти Хадамоти муҳоҷират дар соли 2014 мавриди баррасӣ қарор доданд. 
 Бо мақсади беҳтар намудани сифати хизматрасонии тиббӣ ба муҳоҷирони меҳнатӣ лоиҳаи “Созишнома ба эътирофи якҷояи хулосаҳои тиббӣ оид ба ҳолати саломатии муҳоҷирони меҳнатӣ дар давлатҳои аъзои Иттиҳоди иқтисоии Аврупо ва Осиё (ЕврАзЭС)” таҳия гардида, аз тарафи Комиссияи доимии намояндагон дар назди Иттиҳоди иқтисоии Аврупо ва Осиё (ЕврАзЭС) тасдиқ гардидааст. Дар айни замон, тибқи ахбори Вазорати тандурустӣ ва ҳифзи иҷтимоии аҳолии Ҷумҳурии Тоҷикистон ҳуҷҷати мазкур дар сатҳи мувофиқаи байнидавлатӣ қарор дорад.                                         
Мутобиқи моддаи 3 Қонуни Федералӣ “Дар бораи нафақаҳои меҳнатӣ дар  Федератсияи Русия” “Шаҳрвандони хориҷӣ ва шахсони бетабаа, ки доимӣ дар Федератсияи Русия будубош менамоянд, ба нафақаи меҳнатии ин давлат ҳуқуқ доранд”. Шаҳрвандони Ҷумҳурии Тоҷикистон низ ҳангоми ба синни нафақа расидан ва дар сурати зисти доимӣ дар ҳудуди Федератсияи Русия ҳуқуқ доранд соҳиби нафақаи ин давлат гарданд.
“Аксари шаҳрвандони Тоҷикистон, ки аз тариқи иҷозат барои кор дар Федератсияи Русия муваққатан кор менамоянд ва маблағҳои заруриро ба фонди нафақаи ин давлат пардохт менамоянд, бинобар набудани созишномаи байнидавлатӣ, аз ин имтиёз маҳрум мебошанд”-иттилоъ дод сухангӯи хадамот Абдуллоҳи Қодирӣ.   
Ба гуфтаи мусоҳиб аз ин лиҳоз, зарурат ба миён омадааст, ки аз ҷониби мақомоти ваколатдори давлатӣ дар соҳаи нафақа ҷиҳати фаро гирифтани муҳоҷирони меҳнатӣ-шаҳрвандони Ҷумҳурии Тоҷикистон бо нафақа, Созишномаи байниҳукуматӣ оид ба суғуртаи иҷтимоӣ ва нафақа байни Федератсияи Русия ва Ҷумҳурии Тоҷикистон таҳия ва ба имзо расад.