Муҳоҷирони меҳнатӣ дар ватан суғурта хоҳанд шуд

Душанбе, 12.01.2015 (АМИТ «Ховар», Лайло Тоирӣ).- Ба суоли рӯзноманигорон  оид ба ҳалли мушкилот дар самти нафақагирӣ ва суғуртаи  шаҳрвандони ҷумҳурӣ, ки дар хориҷи кишвар кор мекунанд, муовини якуми директори Агентии  суғуртаи иҷтимоӣ ва нафақаи назди Ҳукумати Ҷумҳурии Тоҷикистон Назокат Одинаева дар нишасти матбуотӣ чунин посух дод: 
«Агентии суғуртаи иҷтимоӣ ва нафақа, Вазорати меҳнат, муҳоҷират ва шуғли аҳолӣ  дар якҷоягӣ бо Ҳукумати Тоҷикистон ва  Федератсияи Русия ҳамкори дошта, барои ҳалли ин масъала корҳо бурда истодааст.  Аз тарафи ФР пешниҳод гардид, ки Тоҷикистон  лоиҳаи созишномаи дутарафаро  ироа  намояд. Лоиҳаи ин созишнома бо  вазорату идораҳои дахлдор мувофиқа шуда, дар айни ҳол ба Ҳукумати ҶТ барои мувофиқа пешниҳод гардидааст.  Дар назар аст, ки рӯзҳои наздик лоиҳаи созишнома аз тарафи Ҳукумати ҶТ дастгирӣ шуда, ба ФР фиристода шавад. Дар созишнома мо кӯшиш дорем муҳоҷирони меҳнатиро бо нафақа таъмин намоем, то баъди бозгашт  ба ватан ҳар як муҳоҷири меҳнатӣ  ҳуқуқҳои худро дошта бошад». 
Нисбат ба  суғуртаи муҳоҷирони меҳнатӣ Н. Одинаева посух дод, ки агентӣ кӯшиш дорад, то андози иҷтимоии муҳоҷир ба ҳисобе, ки дар ватан кушода мешавад, гузаронида шавад.  «Баҳс ин ҷо дар мавриди маблағи андоз рафта истодааст, ки суратҳисоби муҳоҷир дар ватанаш кушода мешавад ва ё дар кишваре, ки фаъолият дорад. Ин масъала ҳоло ҳалли худро наёфтааст, —  афзуд Н.Одинаева.
Шаҳрвандони Тоҷикистон, ки дорои душаҳрвандӣ мебошанд, имкони  дар ФР нафақа гирифтанро доранд.