Мулоқоти П. Давлатзода бо Ш. Шоисломов ва А. Смагулов

Душанбе, 9.01.2015 (АМИТ «Ховар»).- 8 январи соли 2015 муовини вазири корҳои хориҷии Ҷумҳурии Тоҷикистон Парвиз Давлатзода Сафири Фавқулода ва Мухтори Ҷумҳурии Ӯзбекистон дар Ҷумҳурии Тоҷикистон Шоқосим Шоисломовро ба ҳузур пазируфт.
Зимни мулоқоте, ки дар фазои анъанавии тафоҳум ва созанда доир шуд, масоили мубрами дуҷониба ва минтақавӣ мавриди муҳокима қарор гирифт. Таваҷҷуҳи хосса ба татбиқи амалии қарордодҳои сарони ду давлат, ки дар мулоқоти онҳо дар ҳошияи Саммити СҲШ дар Душанбе моҳи сентябри соли сипаришуда ҳосил гардид, зоҳир  шуд. Ҷонибҳо ба манзури боз ҳам бештар вусъат бахшидани равобити байни ду кишвари ҳамсоя андешидани як зумра тадбирҳоро дар ин самт мувофиқи мақсад донистанд.
Инчунин 8 январи соли 2015 муовини вазири корҳои хориҷии Ҷумҳурии Тоҷикистон Парвиз Давлатзода Сафири Фавқулода ва Мухтори Ҷумҳурии Қазоқистон дар Ҷумҳурии Тоҷикистон Агибай Смагуловро  бо хоҳиши ӯ ба ҳузур пазируфт.
Зимни мулоқот атрофи масоили мубрами дуҷониба ва минтақавӣ мубодилаи афкор сурат гирифт. Тарафҳо ба сатҳи имрӯзаи муносибатҳои дӯстонаи ду кишвар баҳои баланд дода, зарурати андешидани тадбирҳои мушаххасро ҷиҳати амалисозии чорабиниҳои дар соли 2015 ба нақша гирифташуда, бахусус омодагӣ ба сафари расмии Президенти Ҷумҳурии Қазоқистон Нурсултон Назарбоев ба Ҷумҳурии Тоҷикистон ва ҷаласаи навбатии Комиссияи муштараки байниҳукуматии Тоҷикистону Қазоқистон оид ба ҳамкориҳои  иқтисодӣ таъкид сохтанд.
Мулоқот дар фазои анъанавии дӯстона ва тафоҳум сурат гирифт.