Низомномаи аттестати аълои универсалӣ барои хонандагон

 
Душанбе, 05.01.2015. (АМИТ “Ховар”, Ситораи Боймурод).- Бо қарори Ҳукумати Ҷумҳурии Тоҷикистон “Низомномаи аттестати аълои универсалӣ бо медали тилло ва нуқра, аттестати аълои равиявӣ бо медали тилло ва нуқра ва тасдиқи ҳуҷҷатҳои намунаи махсус” барои хонандагон тасдиқ гардид, -гуфт  вазири маориф ва илми Тоҷикистон Нуриддин Саид имрӯз, 5 январ зимни нишасти матбуотӣ.
Ба гуфтаи мавсуф ҳамчунин  “Барномаи давлатии такмили таълим ва омӯзиши забонҳои русӣ ва англисӣ дар Ҷумҳурии Тоҷикистон барои солҳои 2015-2020 бо қарори Ҳукумати Ҷумҳурии Тоҷикистон тасдиқ  шудааст”. Инчунин лоиҳаҳои “Тартиби қабул ба муассисаҳои таҳсилоти миёнаи касбӣ”, “Тартиби қабули довталабон-шаҳрвандони хориҷӣ ба муассисаҳои таҳсилоти олии касбӣ” ва “Тартиби қабули донишҷӯён барои гирифтани таҳсилоти дуюми олии касбӣ дар соли таҳсили 2014-2015” ва дигар санадҳои муҳими соҳа тасдиқ шуданд.
Зинаи таҳсилоти томактабӣ ва миёнаи умумӣ яке аз зинаҳои асосӣ дар соҳа маҳсуб ёфта, имрӯз шумораи кӯдакистонҳо дар ҷумҳурӣ аз 508 ба 527 адад расидааст, ки нисбат ба соли гузашта 19 адад зиёд мебошад ва аз инҳо 8 адад ба вилояти Хатлон, 9 адад ба вилояти Суғд, 1 адад ба шаҳри Душанбе, 1 адад ба ноҳияи Ҳисор рост меояд. Шумораи кӯдакон дар онҳо аз 76370 нафар ба 80442 нафар расид, ки нисбат ба ҳамин давраи соли гузашта 4072 нафар зиёд мебошад, -афзуд  вазири маориф ва илми Тоҷикистон Нуриддин Саид зимни ҳисоботи солонаи вазорат ба хабарнигорон.