Омӯзиши беҳтарин доварони футболи тоҷик дар Туркия

Душанбе, 31.01.2015 (АМИТ “Ховар”, Фарзонаи Давлат).- Дар назар аст ҳафтаи оянда беҳтарин доварони футболи Тоҷикистон, ки дар мавсими нав бозиҳои дастаҳои лигаи олиро хизматрасонӣ мекунанд, ҷиҳати гузаронидани ҷамъомади таълимӣ-омӯзишии даҳрӯза ба Туркия сафар кунанд.  
Бино ба иттилои Федератсияи футболи кишвар, рӯзи 5 феврали соли равон дувоздаҳ нафар доварони тоҷик барои иштирок дар ҷамъомади омӯзишӣ-машқӣ ба Анталияи Туркия сафар хоҳанд кард. Доварони тоҷик дар меҳмонхонаи «Аркадия» ҷойгир хоҳанд шуд.
Гуфта мешавад, ин марҳилаи омодагии доварони пешоҳанг ва инчунин доварони ҷавони болаёқати кишвар то 15 феврал идома мекунад. Доваарони кишвар таҳти роҳбарии дастурдиҳанда Абдураҳим Бобоев дараҷаи касбияти худро сайқал дода, ҳамчунин бозиҳои санҷишии дастаҳоеро, ки дар Анталия ҷамъомадҳои омӯзишӣ-машқияшонро мегузаронанд, хизматрасонӣ мекунанд. 
Ёдрас мешавем, ки доварони тоҷик бори аввал аст дар таърихи футболи тоҷик ба мавсими нави футбол дар хориҷи кишвар омодагӣ мебинанд.