Ояндаи Тоҷикистон дар дасти ҷавонон аст

Душанбе, 02.01.2015 (АМИТ «Ховар», Фарзонаи Давлат).- “Ояндаи Тоҷикистон дар дасти ҷавонон!”- таҳти чунин ном 30-юми  декабри соли  2014 вохӯрии рохбарияти Кумитаи ҷавонон, варзиш ва сайёҳӣ ва сохторҳои маҳаллии он дар вилояти Суғд бо ҷавонон ва устодон дар Донишгоҳи давлатии Хуҷанд ва Донишгоҳи давлатии ҳуқуқ, бизнес ва сиёсати Тоҷикистон доир гардид. 
Дар мулоқот Мавсума Муинӣ, муовини якуми раиси Кумитаи ҷавонон, варзиш ва сайёҳӣ ҷавононро ба саҳмгузорӣ дар беҳдошти ҳаёти иҷтимоиву иқтисодии мамлакат, рушду ободии диёр ва баланд бардоштани шуҳрати Тоҷикистон дар арсаи байналмилалӣ даъват намуд. 
Тавре ки дар бора аз Кумитаи ҷавонон, варзиш ва сайёҳии назди Ҳукумати Тоҷикистон хабар доданд, Мавсума Муинӣ атрофи пешгирии ҷавонон аз ҳама гуна омилҳои номатлуб, аз қабили ҷинояту ҷинояткорӣ ва шомилшавии онҳо ба ҳар гуна ҳизбу ҳаракатҳои иртиҷоӣ дахл карда, таъкид дошт, ки ҷавонони имрӯза бояд маърифати баланди ҳуқуқӣ ва сиёсӣ дошта бошанд. 
Дар идомаи силсиламулоқотҳои судманд  Мавсума Муинӣ, муовини якуми раиси Кумитаи ҷавонон, варзиш ва сайёҳӣ, ҳамчунин дар қисми ҳарбии 41356-и дар ноҳияи Б. Ғафуров бо сарбозону афсарон ва ҳайати шахсии қисми низомӣ мулоқот анҷом дод.