Ш. Соҳибов: камбудиҳо ҳоло зиёданд

Душанбе, 23.01.2015. (АМИТ «Ховар», Лайло Тоирӣ).- Аз буҷети ҷумҳуриявӣ ба буҷетҳои маҳаллӣ субвенсия ба маблағи 797,5 млн.  сомонӣ ё ин ки 99,3 фоизи нақша, бо роҳи ҳисобии байниҳамдигарӣ 1,6 млн. сомонӣ, барои вазифаҳои пойтахт 11,0 млн. сомонӣ, қарзи кӯтоҳмуддат 24,0 млн. сомонӣ, ҷамъ ба маблағи 834,1 млн. сомонӣ ҷудо  шудааст.   Ин нуктаро муовини вазири молия Шавкат Соҳибов имрӯз зимни нишасти матбуотӣ ироа намуд. 
Муовини вазир зикр кард, ки дар давраи сипаригардида барои рушди соҳаҳои иқтисодиёти мамлакат аз ҳисоби Фонди захиравии Президенти ҶТ 217,7 млн. сомонӣ, аз ҳисоби Фонди хароҷоти пешбининашудаи Ҳукумати ҶТ 55,0 млн. сомонӣ ва аз ҳисоби дигар захираҳои буҷетӣ 215,5 млн. сомонӣ, ҷамъ 488,2 млн. сомонӣ маблағҳои иловагӣ равона гардидаанд. 
«Вале новобаста аз натиҷаҳои бадастомада ва таъмини барзиёди қисми даромади буҷет, ҳоло ҳам дар ин самт як силсила камбудиҳо ҷой дошта, на ҳамаи захираҳои мавҷудаи молиявӣ ба буҷет пуррра ворид  шудаанд»,- гуфт Ш. Соҳибов.