Суғд: вуруди 787 мавод ба шуъбаи Шўрои адлия

Душанбе, 29.01.2015. (АМИТ “Ховар”, Мавҷуда Анварӣ).-  Дар соли сипаригардида ба шуъбаи Шўрои адлия дар вилояти Суғд 787 (соли 2013 — 776) мавод ворид шуданд, ки нисбат ба соли қаблӣ 11 мавод зиёд мебошад.
 «Аз рўи маблағҳои боҷи давлатӣ, ҷарима, мусодираи молу мулк ба тариқи маблағҳои пулӣ, товони зарари аз тасарруфи молу мулки давлатӣ ва аз дигар ҷиноятҳо расонидашуда, инчунин даъвоҳои прокурорҳо ва навиштаҷоти иҷроии мақомоти гуногуни давлатӣ судҳои шаҳру ноҳияҳои вилояти Суғд маблағи умумии 7 122 034 (7 532 084) сомониро амалан ба буҷети ҷумҳурӣ рўёнидаанд»,- иброз намуд сардори шуъбаи Шўрои адлия дар вилояти Суғд Маъруф Бурҳониён зимни нишасти матбуотӣ ба хабарнигорон.
Ҳамзамон Маъруф Бурҳониён аз камбудиҳо дар фаъолияти судҳо, ба монанди дар баъзе судҳо ҷой доштани ҳолатҳои сари вақт тайёр накардан ва ба тарафҳо насупоридани санадҳои судӣ, дар муҳлатҳои муқарраршуда баррасӣ нагардидани парвандаҳои судӣ, омода ва шинос накардани тарафҳо бо санадҳои маҷлиси судӣ ёдрас шуда, зикр намуд, ки камбудиҳои ҷойдоштаро бартараф карда, ҳамзамон парвандаҳое, ки бо сабабҳои гуногун, аз ҷумла кофтукови судшавандаҳо, таъйини ташхисҳои судӣ, ирсол гардидани супоришҳои судӣ, ҳозир нашудани тарафҳо ва дигар ҳолатҳо муддатҳои тўлонӣ баррасӣ нагардидаанд, диққати ҷиддӣ дода, баррасии онҳоро таъмин менамоянд.