Таъмири иншооти обрасонии ноҳияҳои Восеъ ва Ҳамадонӣ

Восеъ, 20.01.2015. (АМИТ «Ховар», Сулаймони  Хол).- Ҳукумати Ҷумҳурии Тоҷикистон ва Вазорати кишоварзии мамлакат дар доираи  лоиҳаи «Таъмини шуғли аҳолӣ барои устувории хоҷагии қишлоқ ва идоракунии захираҳои обӣ» ташкили ассотсиатсияҳои истифодабарандагони обро роҳандозӣ намудаанд. Ташкилоти ҷамъиятии Маркази дастгирӣ ва рушди соҳибкории вилояти  Хатлон дар ноҳияҳои Ҳамадонӣ ва Восеъ ба ташкили ассотсиатсияҳои истифодабарандагони об шурӯъ намуд. Чунин ассотсиатсияҳо дар ҷамоати деҳоти ба номи Мирзоалӣ Вайсови ноҳияи Восеъ ташкил шуд. Инчунин харитаи ҷамоати деҳот ва нуқтаҳои тақсимоти об таҳия гардида, маблағи ҳаққи истифодаи об муайян гардид. Умед аст, ки ассотсиатсияҳои истифодабарандагони об минбаъд дар рафъи камбудиҳои соҳа мусоидат хоҳанд кард. Дар марҳилаи дуюми барномаи мазкур заҳбуру заҳкашҳо ва иншооти обрасонии ноҳияҳои Восеъ ва Ҳамадонӣ тоза ва таъмир мегарданд.