Татбиқи 15 лоиҳаи сармоягузорӣ дар бахши нақлиёт

Душанбе,  27.01.2015. (АМИТ «Ховар»,  Кристина  Эрлих).- «Тайи  соли 2014 – ум 15 лоиҳаи  сармоягузорӣ  ба  маблағи умумии  беш  598  миллион  доллари  ИМА  дар  амал  татбиқ  шуд. Барои амалӣ  шудани  лоиҳаҳои  зикршуда  2400  нафар  ҷалб  гардид, ки  62  фоизи  онҳоро  шаҳрвандони  Тоҷикистон  ташкил  медиҳанд», —  гуфт  дар  нишасти  матбуотӣ  вазири  нақлиёти  ҶТ  Хайрулло  Асозода.
Вазир  зикр  намуд, ки  дар  ин  муддат корҳои сохтмонию  барқароркунӣ   дар  5  иншоот,  аз  ҷумла  сохтмони  навбати  сеюми роҳи  мошингарди  Шағон – Зигар,  навсозии  роҳи  мошингарди  Данғара – Кангурт,  барқарорсозии  роҳҳои  мошингарди  самти  нақби «Озодӣ», лоиҳаи  харидории  техника  ва  механизмҳо  барои  нигоҳубини роҳҳои  мошингард ба  маблағи  умумии  беш  аз  115 миллион  доллари  ИМА анҷом  ёфтанд. Татбиқи  ин  лоиҳаҳо   имкон  дод, ки  47,9  километр  роҳҳои  мошингарди  дорои  5  пул  ба таври  илова барқарор  карда шавад. 
Ғайр аз  ин, дар чараёни  татбиқи  лоиҳаи  сармоягузорӣ барои харидории техника ва  таҷҳизоти  мавриди  зарурати роҳҳо  сохтмони  ду   корхонаи  асфалту бетон  анҷом  ёфт.
«Алҳол дар   соҳаи  мазкур татбиқи  лоиҳаҳои  сармоягузорӣ  ба  маблағи  умумии   беш  аз  483  миллион  доллари  ИМА бо  ҷалби 1803  нафар  кормандон  идома дорад, ки  71  фоизи  онҳоро   шаҳрвандони  Тоҷикистон  ташкил  медиҳанд», — гуфт  дар  хотима  Хайрулло  Асозода.