Татбиқи кафолатҳои иҷтимоии қонунгузории хизмати давлатӣ

Душанбе, 06.01.2015. (АМИТ “Ховар”, Ситораи Боймурод).- Ба иттилои Агентии хизмати давлатии назди Ҳукумати Ҷумҳурии Тоҷикистон яке аз самтҳои фаъолият мусоидат ба татбиқи кафолатҳои иҷтимоии муқаррарнамудаи қонунгузории хизмати давлатӣ нисбат ба хизматчиёни давлатӣ мебошад.
-Дар ин масъала агентӣ 39 аризаи шаҳрвандонро оид ба муайян намудани собиқаи хизмати давлатӣ, гирифтани кумакпулии яквақта, мусоидат барои давом додани фаъолият, баромадан ба нафақа, барқарор кардани ҳуқуқу манфиатҳои хизматӣ ва масъалаҳои музди меҳнат омӯхта, дар муҳлати муайяншуда ҷавоб ирсол намуд,-зикр шуд имрӯз дар нишасти матбуотии ин агентӣ.
-474 нафар хизматчии давлатии мақомоти давлатӣ нафақа мегирад, 144 хизматчии давлатӣ бо сабаби ба синни ниҳоӣ расидан аз мансаб озод  шуда, дар асоси қонун муҳлати дар хизмати давлатӣ будани 78 нафар хизматчии давлатӣ тамдид шуд,-таъкид шуд дар нишасти хабарӣ.