Қадрдонии «Дружиначиёни ихтиёрӣ» аз ҷониби милитсияи тоҷик

Душанбе, 25.02. 2015. (АМИТ «Ховар», Муқаддас Темурзода).-Имрӯз дар Душанбе ҷаласаи ҷамъбастии фаъолияти «Дружиначиёни ихтиёрӣ» ва  кормандони ғайриштатии мақомоти корҳои дохилӣ дар соли 2014 бо иштироки вазири корҳои дохилӣ Раҳимзода Рамазон Ҳамро, раиси Кумитаи ҷавонон, варзиш ва саёҳии назди Ҳукумати Ҷумҳурии Тоҷикистон Абдуллозода Рустам Аҳтам, сардорони раёсатҳо, аъзои дружинаҳои халқӣ ва сардорони ситодҳо аз тамоми шаҳру ноҳияҳои ҷумҳурӣ баргузор гардид.
ВКД ҶТ хабар медиҳад, ки дар ҷаласа Р. Раҳимзода зикр кард, ки: «Ҳифзи тартиботи ҷамъиятӣ, амнияти сокинони кишвар, риояи қонуният ва мустаҳкам намудани тартиботи ҳуқуқӣ бе иштироки шаҳрвандон ғайриимкон аст. Такя намудан ба кумаки шаҳрвандон ва  ташкилоти ҷамъиятӣ аз шартҳои  муҳим ва самараноки  мақомоти ҳифзи ҳуқуқ оид ба огоҳонидан ва пешгирӣ намудани ҳуқуқвайронкуниҳо ба ҳисоб меравад». 
-Мавриди тазаккур аст, ки аз ҳисоби аҳли ҷомеа хоҳишмандоне, ки мехоҳанд нақш ва ҳиссаи худро ба ҳайси кормандони ғайриштатии милитсия ва дружинаҳои ихтиёрӣ дар таъмини тартиботи ҷамъиятӣ ва амнияти шаҳрвандон гузоранд, рўз аз рўз зиёд шуда истодааст.
Ин далели он аст, ки фарзандони баномуси миллат дар шукуфоии Ватани худ ҳисса мегузоранд ва манфиатдор будани худро дар ин раванд нишон дода истодаанд»,- афзуд Р. Раҳимзода.
Дар хотимаи чорабинӣ бо фармони вазири корҳои дохилӣ як гурӯҳ кормандони ғайриштатии милитсия ва дружиначиёни ихтиёрӣ, ки дар пешгирии ҷинояткорӣ ва дастгир намудани ҷинояткорон фаъол буданд, бо туҳфаҳои арзишнок ва хотиравӣ қадрдонӣ гардиданд.