Ҳалли мушкилоти масоили иҷтимоии инфиродӣ ва коммуналӣ

Душанбе, 28.02.2015. (АМИТ «Ховар», Мавҷуда Анварӣ).-Вохӯрии роҳбарияти Мақомоти иҷроияи ҳокимияти давлатии шаҳри Кӯлоб бо мардум идома дорад. Баъд аз дидор бо сокинони чанд деҳаи ҷамоати Даҳана иҷрокунандаи вазифаи раиси шаҳри Кӯлоб Хайруллои Амонулло бо истиқоматкунандагони маҳаллаҳои Ҳисориён, Ҳакимов, Лоҳутӣ, Сарвароваи шаҳри Кӯлоб мулоқот кард. 
Миёни раис ва сокинон суҳбати озоду самимӣ доир шуд, ки дар он масоили ҷойдоштаи маҳаллаҳои номбурда мавриди баррасӣ қарор дода шуданд. 
Бояд гуфт, ки дар вохӯрӣ бо дастури Хайруллои Амонулло ҳамчунин муовинони раиси шаҳр ва масъулини идораву ташкилоти мухталифи шаҳр ширкат варзида, ба саволҳои сершумори мардум ҷавоб гуфтанд. Сокинон аз роҳбарияти шаҳр аслан ҳалли мушкилоти масоили иҷтимоии инфиродӣ ва коммуналии ҷамъятиро тақозо карданд.