Ҳомии Ватан- спартакиадаи варзишӣ

Хуҷанд, 06.02.2015. (АМИТ Ховар, Абдуҳад Шарифзода).-Дирӯз дар  Қасри варзишии шаҳри Хуҷанд мусобиқаи ҳарбию варзишии Ҳомии Ватан оғоз ёфт. Ҳадафи мусобиқа аз ҷалби ҳомиёни ватан ба варзиш, баланд бардоштани дараҷаи тарбияи ҷисмонии онон,  мустаҳкам намудани алоқаи дӯстии байни сарбозону афсарон ва ташвиқи тарзи ҳаёти солим  иборат аст. 
Мусобиқаи мазкур анъанавӣ буда, он ҳамасола бахшида ба рӯзи Артиши миллӣ, яъне таъсиси Қувваҳои мусаллаҳи кишвар  бо ташаббуси комиссариати ҳарбии вилояти Суғд  роҳандозӣ мешавад. Дар мусобиқаи имсола 14 дастаи варзишгарон аз қисмҳои низомии ҳудуди вилоят иштирок намуда, аз рӯи 10 намуди варзиш, аз ҷумла:  бандкашӣ, давидан ба масофаи 100 м, турниккашӣ, дастхобонӣ, муҳорибаи тан ба тан, бардоштани санг, футболи хурд, тирпарронӣ аз туфангчаи Макаров ва гузаштан аз монеаҳо  маҳорати худро нишон медиҳанд. 
Чорабинӣ то  20 феврал идома ёфта, ғолибон  ҳам дар ҳайати шахсӣ ва ҳам даставӣ бо туҳфаҳои хотиравии комиссариати ҳарбӣ мукофонида мешаванд.