Ҳушдори Кумитаи ҳолатҳои фавқулода ба сокинон

Душанбе, 24.02.2015 (АМИТ «Ховар», Мавҷуда Анварӣ).- Бар асари барфрезиҳои шадиди ду рӯзи охир ва фаромадани тарма дар баъзе шоҳроҳҳо ва ағбаҳои кишвар, аз ҷумла дар   шоҳроҳи Душанбе-Хуҷанд  ағбаи Хобурубод ҳаракати мошинҳо мавқуф гузошта шудааст.
 Дар ин бора Ориф Нозимов, сардори маркази матбуоти Кумитаи ҳолатҳои фавқулода ва мудофиаи шаҳрвандии кишвар ба хабарнигори АМИТ «Ховар» хабар дод. 
Дар робита ба ин Кумитаи ҳолатҳои фавқулода ва мудофиаи шаҳрвандӣ аз тамоми шаҳрвандон, меҳмонон, бахусус ронандагону мусофирон даъват намудааст, ки то 26 феврал аз сафар ба тариқи шоҳроҳҳо ва минтақаҳои кӯҳӣ худдорӣ намоянд. 
Тибқи пешгӯии Муассисаи давлатии обуҳавошиносӣ то 26-уми феврали соли равон дар кишвар ҳавои ноустувор боқӣ мемонад. «Кумитаи ҳолатҳои фавқулода тамоми шаҳрвандон ва меҳмононро огоҳ мекунад, ки дар ин рӯзҳо аз сафар худдорӣ кунанд, зеро дар пайи боридани барфи зиёд ҳаракат дар бархе аз шоҳроҳҳо душвор ва баста шудааст. Дар сурати бо зарурият сафар намудан ҳатман маводи ниёзи аввалро бо худ ҳамроҳ бигиранд»,-илова намуд манбаъ.