Ҷалби муҳоҷирони меҳнатӣ ба омӯзиши забони русӣ

Душанбе, 14.02.2015. (АМИТ «Ховар», Мавҷуда Анварӣ).-  Бо мақсади дар маркази шаҳру ноҳияҳо, ҷамоатҳои шаҳрак ва деҳот барои муҳоҷирони меҳнатӣ таъсис додани марказҳои бозомӯзии забони русӣ аз ҷониби сохторҳои дахлдор, аз ҷумла Раёсати Хадамоти муҳоҷират ва Сарраёсати Агентии меҳнат ва шуғли аҳолии Вазорати меҳнат, муҳоҷират ва шуғли аҳолӣ дар вилояти Суғд корҳои муайян ба анҷом мерасанд. Тибқи иттилои Хадамоти матбуоти раиси вилояти Суғд, ҳамаи марказҳои таълимии вазорати мазкур дорои иҷозатномаи омӯзонидани забони русӣ мебошанд.
Бо мусоидати бевоситаи шуъбаю бахшҳои Агентии меҳнат ва шуғли аҳолӣ аз оғози сол дар шаҳру ноҳияҳои Конибодом, Исфара, Истаравшан, Бобоҷон Ғафуров, Мастчоҳ ва Ғончӣ 127 нафар ба курсҳои омӯзиши забони русӣ ҷалб гардид.
«Тибқи нақша рӯзҳои наздик боз дар шаҳри Қайроққум, ноҳияҳои Мастчоҳ, Ашт ва Спитамен 65 нафар ба чунин курсҳо ҷалб мегарданд»,-илова намуд манбаъ.