1309 нашъаманд дар Хатлон

Душанбе, 11.02.2015 (АМИТ «Ховар», Мавҷуда Анварӣ).- «Тибқи ҳисоботи оморӣ дар ҳудуди вилоят 1309 нашъаманд ба қайд гирифта шудааст. Аз ин теъдод 17 нафараш зан аст. Тамоюли зиёдшавии миқдори нашъамандон дар соли 2014 дар шаҳру ноҳияҳои Қӯрғонтеппа, Кӯлоб, Бохтар, Вахш, Ёвон, Ҷомӣ, Фархор, Восеъ, Ҳамадонӣ ва Данғара мушоҳида мешавад»,-ин нукта дар ҷаласаи навбатии Шӯрои ҳамоҳангсозӣ оид ба пешгирии истеъмоли маводи нашъадор, ки дар шаҳри Қурғонтеппа доир гардид, таъкид гардид.
Аъзои Шӯро масъалаҳои алоқаманд оид ба иҷроин бандҳои дахлдори “Стратегияи миллии мубориза бар зидди гардиши ғайриқонунии маводи мухаддир дар ҶТ барои солҳои 2013-2020”-ро мавриди таҳлилу баррасӣ қарор доданд. 
Дар ҷаласа инчунин нақшаи фаъолияти Шӯрои ҳамоҳангсозӣ оид ба пешгирву истеъмоли маводи нашъадор дар соли 2015 баррасӣ гардид. Пешниҳод гардид, ки дар шаҳру ноҳияҳое, ки вазъи нашъамандӣ ташвишовар мебошад, аз тарафи Шӯрои ҳамоҳангсозии вилоят гурӯҳи корӣ таъсис дода шуда, санҷишҳои мунтазам ва ғайринавбатӣ гузаронида шавад.