«Амонатбонк»: ҷаласа бахшида ба Соли оила

Душанбе, 20.02.2015. (АМИТ «Ховар», Лайло Тоирӣ).-Дар маҷлисгоҳи Раёсати БДА ҶТ «Амонатбонк» бо иштироки ҳайати васеи кормандони Раёсати бонк ва филиалҳои шаҳри Душанбе оид ба Соли оила эълон шудани соли 2015 ҷаласаи тантанавӣ баргузор гардид. 
Ба иттилои хадамоти матбуоти бонк, мақсади ҷаласа аз баррасии нақши оила дар таълиму тарбияи фарзанд ва ҷомеаи солим иборат буд.  Муовини якуми раиси Раёсат Руҳулло Ҳакимзода дар масъалаи нақши волидайн дар таълиму тарбия фарзанд, натиҷаи риоя накардани қонунҳо ва бархурдор набудан аз оқибатҳои манфии издивоҷи хешутаборӣ, тарбияи носолими фарзандон ва сабабҳои интихоби роҳҳои нодурусту ба гурӯҳҳои тундрав пайвастани бархе аз ҷавононро натиҷаи тарбияи носолим дар оила гуфт. 
Муовини раиси Кумитаи кор бо занон ва оилаи назди Ҳукумати Ҷумҳурии Тоҷикистон Марҳабо Ҳалимова дар бобати баробарҳуқуқии зан ва мард дар оилаву ҷомеа, сабабҳои пош хӯрдани  оилаҳои ҷавон, издивоҷи хешутаборӣ ва оқибатҳои он, дур мондани фарзандон аз таълиму тарбия ва мавқеи зан дар ҷомеаи кунунӣ бо мисолу иқтибосҳо андешаҳои худро иброз намуданд.