Баландии Парчами давлатӣ дар Нуробод 35 метр аст

 Душанбе, 09.02.2015. (АМИТ «Ховар», Мавҷуда Анварӣ).- Чанде пеш дар даромадгоҳи шаҳраки Дарбанди ноҳияи Нуробод Парчами Ҷумҳурии Тоҷикистон бо баландии 35 метр, бо таносуби бару дарозии умумии   4,5 ба 9 метр қомат афрохт. 
Тибқи иттилои корманди мақомоти иҷроияи ҳокимияти давлатии ин ноҳия Гулрухсор Неъматова бахшида ба ин муносибат дар ноҳия ҷамъомади тантанавӣ баргузор гардид. 
Раиси ноҳияи Нуробод Сайдамир Сиёмарзода мардуми  минтақаро бо парафшонии Парчами давлатӣ, ки рамзи давлатдории  миллати тоҷик аст, табрик намуда, гуфт: «Парчами тоҷикон рамзи Истиқлолияти давлатии Ҷумҳурии Тоҷикистон мебошад. Эҳтироми Парчами давлатӣ ва расидан ба қадри он аз ҷумлаи вазифаҳои ифтихорӣ ва қарзи шаҳрвандии аҳли ҷомеаи мо ба ҳисоб меравад ва зарур аст, ки ҳисси ифтихор аз парафшонии он дар сиришту фитрати ҳар як шаҳрванди ватандӯсту меҳанпарасти кишвар доимо пойбарҷо бошад».