Чавгонбозони тоҷик соҳиби гувоҳнома гардиданд

  Душанбе, 16.02.2015.(АМИТ «Ховар», Марзия Саидзода).-8 нафар чавгонбози тоҷик дар Эрон соҳиби гувоҳнома гардид. 
    Гувоҳномаҳоро ба чавгонбозони тоҷик масъулини Федератсияи варзиш ва ҷавонони Эрон дар маросими тантанавӣ, ки дар он Неъматулло Эмомзода — Сафири Фавқулода ва мухтори Ҷумҳурии Тоҷикистон дар Эрон, Абдулҳамиди Аҳмадӣ — мушовири олӣ ва муовини фарҳангии Вазорати варзиши Эрон ҳузур доштанд, тақдим намуданд.
           Дипломати тоҷик ин маросимро барои ҷавонони чавгонбози тоҷик таърихӣ арзёбӣ карда, гуфт: «Барои мо боиси ифтихор аст, ки ду кишвари дӯст — Эрон ва Тоҷикистон дар рушди муносибатҳои фарҳангӣ бо ҳамдилӣ ҳаракат мекунанд ва бо кумаки бародарони эронӣ тавонистем чавгонро дар миёни аввалин  гурӯҳи ҷавонони тоҷик густариш диҳем ва умедворам, ки дар айёми Наврӯз бо таваҷҷуҳ ба назари Сарвари  давлати Тоҷикистон шоҳиди як бозӣ миёни чавгонбозони ду кишвар бошем».
             Назар ба иттилои Шоҳмансури Шоҳмирзо, коршиноси фарҳангии тоҷик дар муассисаи фарҳангии ЭКО, Федератсияи чавгони Эрон пешниҳод намудааст, ки дар оянда омӯзиши чавгон барои бонувони тоҷик низ роҳандозӣ шавад ва федератсия дар ин замина ҳамкорӣ хоҳад намуд.
             Бояд тазаккур дод, ки 8 нафар ҷавони тоҷик дар асоси   тафоҳумномаи ҳамкории варзишӣ миёни Тоҷикистон ва Эрон  муддати 45 рӯз аз устодони варзидаи Эрон нозукиҳои ин бозии бостониро омӯхта ва бар пояи ин тафоҳумнома қарор аст ин бозии қадимӣ дар Тоҷикистон низ эҳё гардад.