Дар ҳавзаи интихоботии Конибодом се номзад сабқат мекунад

                Душанбе, 18.02.2015.(АМИТ «Ховар», Марзия Саидзода).- «Дар Комиссияи ҳавзавии якмандатаи интихоботии Конибодом №19  оид ба интихоботи вакилони Маҷлиси намояндагони Маҷлиси Олии Ҷумҳурии Тоҷикистон 129 ҳазор интихобкунанда ба қайд гирифта шуда, аз он 4 ҳазору 250 нафараш бори аввал дар интихобот иштирок менамояд». Дар ин хусус ба АМИТ «Ховар» Азим Бобоҷонов,  раиси комиссияи ҳавзавии якмандатаи интихоботии Конибодом №19  оид ба интихоботи вакилони Маҷлиси намояндагони Маҷлиси Олии Ҷумҳурии Тоҷикистон иттилоъ дод.         
          Мавсуф афзуд, ки дар ҳавзаи интихоботии якмандатаи интихоботии Конибодом №19   57 участкаи интихоботӣ созмон дода шудааст, ки дутоаш дар беморхона ва қисми ҳарбӣ фаъолият мекунад. 
           Дар интихоботи парлумонӣ, ки 1 март таъйин шудааст, дар ҳавзаи якмандатаи интихоботии Конибодом 3 номзад — Равшан Раҷабов аз Ҳизби халқии демократии Тоҷикистон /ҲХДТ/, Дилбар Сулаймонова -худпешбар аъзои ҲХДТ ва Шокирҷон Ҳакимов -худпешбар, аъзои Ҳизби сотсиал-демократи Тоҷикистон ба қайд гирифта шудаанд. 
    Азим Бобоҷонов гуфт, ки ду номзади дигар -Аҳмадҷон Неъматов ва Баҳобир Саидов, ки ҳар ду худпешбаранд, номзадияшонро бозпас гирифтаанд.