Доварони бозии плей-оффи «Салам Ҷхарта» ва «Хайр» маълум шуданд

Душанбе, 17.02.2015. (АМИТ “Ховар”, Ситораи Боймурод).- Ҳайати доварони хизматрасони бозии плей-оффи Ҷоми АФК-2015 байни «Салам Ҷҳарта» (Лубнон) ва «Хайр» (Тоҷикистон) маълум шуданд.  
Ба иттилои сомонаи расмии Федератсияи футболи Тоҷикистон, сардовари бозӣ Нагор Амир Нур Муҳаммади 32-сола аз Малайзия мебошад, ӯро дар канори майдон ҳамватани 32-солааш Моҳд Шахрин Бин Чи Омар ва Хсу Мин Ю аз Тайбеи Чинӣ кумак мекунанд. Довари эҳтиётии ин бозӣ Муд Бониядифарди 30-сола аз Эрон ва комиссари бозӣ Принс Руфус аз Ҳиндустон таъйин шуданд.
Ёдовар мешавем, ки ин бозии плей-оффи  Ҷоми КФО-2015 байни барандаи Ҷоми Лубнон-2014 «Салам Ҷхарта» ва витсе-чемпиони Тоҷикистон «Хайр»-и Ваҳдат имрӯз, 17-уми феврал дар Бейрут шурӯъ мешаванд.
Дар сурати ғалаба бар дастаи «Салам Ҷҳарта»-и Лубнон «Хайр» ба марҳилаи гурӯҳии Ҷоми АФК-2015 роҳхат мегирад ва  дар гурӯҳи «А» бо «Ал-Веҳдат»-и Урдун, «Ал-Ваҳда»-и Сурия ва «Ал-Наҳда»-и Оман рақобат мекунад.