Иштирок дар интихобот- татбиқи кафолати конститутсионӣ

Душанбе, 25.02.2015. (АМИТ «Ховар», Раъно Нусратуллозода).-Бо мақсади фаҳмонидани моҳияти маъракаи муҳими сиёсӣ — интихоботи вакилони Маҷлиси намояндагони Маҷлиси Олии Ҷумҳурии Тоҷикистон ва маҷлисҳои маҳаллии вакилони халқ, ки 1 марти соли равон таъйин гардидааст, 24 феврал ректори Донишкадаи молия ва иқтисоди Тоҷикистон Ашурбой Солиев бо донишҷӯён суҳбат гузаронид.
Ба иттилои котиби матбуоти донишкада Машҳура Абдуллоева А. Солиев ҳуқуқ ва масъулияти шаҳрвандонро дар раванди интихобот, рӯзи баргузории он, тартиби овоздиҳӣ, тарзи пур кардани бюллетенҳои интихоботӣ, шиносоӣ бо барномаҳои пеш аз интихоботии номзадону ҳизбҳо ва дигар паҳлуҳои ҷараёни ин маъракаи муҳими сиёсӣ тавзеҳ дод.
Мавсуф аз ҷумла таъкид кард, ки иштирок дар интихобот- ин амалӣ намудани кафолати конститутсионии мост ва ҳар як интихобкунанда ба виҷдони худ такя намуда, бояд ба номзади арзанда овоз диҳад. Ҳамчунин гуфта шуд, ки ҳар як шаҳрванд дар ин чорабинии муҳим бетарафӣ зоҳир накарда, бо масъулияти баланд муташаккилона дар он бояд иштирок намояд.