Китоби сол — 2014 ҷамъбаст гардид

Душанбе, 03.02.2015. (АМИТ Ховар, Рафоати Абдулҳамид).- Ба иттилои Вазорати фарҳанги Ҷумҳурии Тоҷикистон озмуни ҷумҳуриявии Китоби сол — 2014 ҷамъбаст гардид. Байни китобҳои 15 нафар довталаб — асарҳои Гулрухсор Дигар ишқ, Фарзона Девон, Кароматулло Мирзоев Зиндагӣ ҳам нафасе, Низом Қосим Хомасӯзон, Аламхон Кӯчаров Муҳаққиқи  соҳибмактаб, Латофат Кенҷаева — силсилаи китобчаҳои бачагона ғолиб дониста, бо дипломи Вазорати фарҳанги Ҷумҳурии Тоҷикистон ва мукофотҳои пулӣ қадрдонӣ шудаанд.
Вазорат дар байни нашрияҳои мақомоти иҷроияи ҳокимияти давлатии вилоятҳо ва шаҳру ноҳияҳои ҷумҳурӣ озмуни ҷумҳуриявиро таҳти унвони ВАО — муқобили коррупсия гузаронид.
Дар озмуни имсола рӯзномаҳои зерин Субҳи меҳнат — и ноҳияи Мӯъминобод, Насими Исфара — и шаҳри Исфара, Ҳақиқати Ховалинг-и ноҳияи Ховалинг, Садои Конибодом-и шаҳри Конибодом, Новый Хатлон — вилояти Хатлон, Согдийская правда — и вилояти Суғд ғолиб дониста шуда, бо дипломҳо ва мукофотҳои пулии Вазорати фарҳанги Ҷумҳурии Тоҷикистон сарфароз гардиданд.