Марги 20 нафар дар Либия

Душанбе,19.02.2015. (АМИТ «Ховар», Иброҳими Ҳабибуллоҳ).-    Ҷумҳурии Мисри араб  аз Созмони Милали Муттаҳид хоҳиш менамояд, ки  барои мубориза бурдан алайҳи гурӯҳҳои ҷангии тобеи «Давлати исломӣ» дар ҳудуди Либия кумаки худро расонад. Неруҳои Миср қароргоҳҳои гурӯҳи «Давлати исломӣ»-ро, ки дар шаҳри Дернаи Либия, дар минтақаи наздисарҳадӣ бо Миср воқеъ аст, гулӯлаборон карданд. Гуфта мешавад, ки дар пайи зарбаҳои ҳавоии Миср ба шаҳри Дернаи Либия 20 нафар ба ҳалок расида, чанд нафари дигар захмӣ гаштааст. Дар байни қурбониён аҳолии осоишта низ ҳаст.
 
    Душанбе,19.02.2015. (АМИТ «Ховар»).- Дар Швейтсария бо эътино ба оқибатҳои офати табиӣ вазъияти фавқулода эълон шудааст. Аз сабаби боришоти зиёди борону барф обхезии шадид  ба амал омадааст. Обхезӣ ба яке аз беморхонаҳои маҳаллӣ таҳдид дошта, беморон ба дармонгоҳҳои дигар таҳвил дода шудаанд. Бояд гуфт, ки дар минтақаҳои хатарнок кормандони Хадамоти наҷотдиҳӣ ва фавқулода дар ҳолати омодабош қарор доранд.
 
     Душанбе,19.02.2015. (АМИТ «Ховар»).- Мувофиқи иттилои Вазорати корҳои хориҷии Италия  ҳукуматдорони Италия тасмим доранд, ки ҳарчи зудтар кумаки  молиявии худро барои ҷилавгирӣ аз табларзаи «Эбола» дар Африқои Ғарбӣ ва Либерия то итмоми соли 2015 идома диҳад. Бояд гуфт, ки ҳукумати Италия аз оғози хуруҷи ин бемории хатарнок дар Африқои Ғарбӣ ва Либерия барои мубориза бо он 7,6 миллион евро ҷудо кардааст. 
 
     Душанбе,19.02.2015. (АМИТ «Ховар»).- Дирӯз аз ҷониби кормандони қудратии  Нигер 160 нафарро бо ҷурми даст доштан
дар амалҳои террористӣ бо гурӯҳи ифротгарои «Боко-Ҳарам» боздошт намуданд. Лозим ба ёдоварист, ки чанде қабл дар ин минтақа силоҳбадастони гурӯҳи ифротгарои «Боко-Ҳарам» амали террористӣ анҷом дода, бар асари он чанд нафар сокини кишварро  ҳалоку захмӣ намуданд. Алҳол боздоштшудагон мавриди тафтишу пурсиши кормандони мақомоти мубориза бар зидди терроризм қарор доранд.