Машварати корӣ дар ҳузури Сарвазири мамлакат

Душанбе, 16.02.2015 (АМИТ «Ховар»).- Бо дастури Президенти Ҷумҳурии Тоҷикистон имрўз дар ҳузури Сарвазири мамлакат Қоҳир Расулзода оид ба ҳолати татбиқи лоиҳаҳои давлатии сармоягузорӣ дар соҳаи роҳу нақлиёт машварати корӣ доир гардид.
Тавре таъкид шуд, айни замон дар мамлакат 11 лоиҳаи сармоягузорӣ дар соҳаи роҳу нақлиёт мавриди иҷро қарор доранд, ки асосан аз сохтмон, таҷдид ва навсозии фурудгоҳҳо, роҳҳои оҳану мошингард ва нақбу пулҳо иборат мебошанд.
Мувофиқи маълумотҳои мавҷуда ин лоиҳаҳо бо маблағи 892 миллион доллари америкоӣ амалӣ гардида, то имрўз ба андозаи беш аз 70 фоиз маблағҳо дар татбиқи ин лоиҳаҳо аз худ карда шудааст.
Дар машварат рафти татбиқи аксар лоиҳаҳои сармоягузорӣ, аз ҷумла лоиҳаи таҷдиди қитъаи Шўрообод-Шоҳони роҳи мошингарди Кўлоб — Қалъаи Хумб нигаронкунанда арзёбӣ гардида, дар татбиқи як қатор лоҳаҳо мувофиқат накардани сифати корҳои анҷомдодашуда ба талаботи имрўза таъкид карда шуд. 
Қарор дода шуд, ки рафти иҷрои лоиҳаҳои сармоягузорӣ дар соҳа зери назорати қатъӣ қарор дода шуда, камбудиҳои ҷойдошта дар татбиқи лоиҳаҳо саривақт бартараф карда шаванд.