Мулоқоти А. Абдуллозода бо ҷавонони Ҳисор

Душанбе, 16.02.2015 (АМИТ “Ховар”, Фарзонаи Давлат).-13-уми феврали соли равон раиси Кумитаи ҷавонон, варзиш ва сайёҳӣ Аҳтам Абдуллозода дар толори мақомоти иҷроияи маҳаллии ҳокимияти давлатии ноҳияи Ҳисор бо ҷавонону наврасон, аҳли ҷамоат, имомхатибҳо, намояндагони мақомоти қудратӣ ва омӯзгорону аҳли зиёи ноҳия мулоқот намуд. 
Раиси Кумита мақсади вохӯриро шарҳи муҳтавои Паёми Президенти мамлакат ба Маҷлиси Олӣ ва гуфтугӯи озоду самимӣ бо қишрҳои гуногуни ҷомеа арзёбӣ карда, Паёми Президенти кишварро ҳуҷҷати ниҳоят муҳим ва тақдирсоз барои тамоми қишрҳои ҷомеа унвон кард: “Паём қабл аз ҳама барои ҷавонон як роҳнамо, ҳидоятгари роҳи росту бенуқсон ва хиради воло арзёбӣ мегардад, зеро он натиҷаи дастовардҳо, фаъолияти яксолаи Ҳукумати мамлакат ва муайянкунандаи афзалиятҳо барои   як соли оянда мебошад.”
Зимни вохӯрӣ раиси кумита аз таваҷҷуҳи баланди масъулин нисбат ба Паёми имсола гуфт: “Мо бо як масъулияти баланди худшиносӣ ба Паёми имсола таваҷҷуҳ менамоем. Зеро Президенти мамлакат Эмомалӣ Раҳмон зимни ироаи он ба ҷавонон таваҷҷуҳи хосса зоҳир намуда, иброз доштааст, ки “дар рушди ҳаёти иҷтимоӣ нақши занон ва ҷавонон ҳамчун неруи пешбарандаи ҷомеа ниҳоят арзишманд мебошад. Ҷавонон ҳамчун давомдиҳандагони татбиқи ҳадафҳои олии мо имрӯзҳо бо азму иродаи қавӣ ба хотири пешрафти ояндаи Ватани маҳбубамон саъю талош карда, дар бештари соҳаҳо ба дастовардҳои назаррас ноил гардидаанд.”
-Боварии роҳбари давлат ба ҷавонон масъулияти моро дучанд намуда, аз мо талаб мешавад, ки бештар ба мутолиа машғул гардида, босаводу соҳибмаърифат бошем. Эҳтироми волидайнро ба ҷо оварда, Ватани азизи худро дӯст дорем,- иброз дошт Аҳтам Абдуллозода. 
Дар идомаи суҳбат ба масъалаҳои вайрон гардидани оилаҳои ҷавон, никоҳи хешутаборӣ ва гаравидани ҷавонон ба ҳизбу ҳаракатҳои иртиҷоӣ низ таваҷҷуҳ зоҳир  шуд. Раиси кумита Аҳтам Абдуллозода барои шиносоӣ бо ҷараёни корҳо аз варзишгоҳи навбунёди ноҳия, ки дорои 20 ҳазор ҷойи нишаст буда, сохтмонаш идома дорад, дидан намуд.