Мулоқоти Шариф Саид бо Че Шаолин

Душанбе,  03.02.2015. (АМИТ «Ховар»,  Кристина  Эрлих).- 2  феврал  раиси  Палатаи  савдо  ва  саноати  Тоҷикистон  Шариф  Саид  дар Ҷумҳурии  Мардумии  Чин  бо   ноиби  президенти Кумитаи  мусоидат ба тиҷорати  музофоти Гуандун Че  Шаолин   мулоқот  анҷом  дод.
Тавре  ки  аз ПСС ҶТ  ба  АМИТ «Ховар»  хабар  доданд, мақсад  аз  ин  мулоқот  роҳандозии ҳамкории  иқтисодии  хориҷӣ  ва  илмию  техникӣ  ба  манзури тақвият  бахшидани минтақаи  иқтисодии Роҳи  абрешими байни  Тоҷикистону  Чин  буд.
Дар  ҷараёни  мулоқот  ҳамчунин  имконияти  рушди  ҳамкории  иқтисодӣ  ва сармоягузорӣ  дар  бахши  технологияҳои  муосир,  сайёҳӣ,  фарҳанг,  маориф,  тандурустии  байни  Тоҷикистон  ва  музофоти  Гуандун  мавриди  муҳокима  қарор  гирифт. 
Шариф  Саид  изҳор  дошт, ки  музофоти  Гуандун  метавонад яке  аз ниҳодҳои асосии ба  Тоҷикистон  ворид  намудани  техникаи  муосир   гардад.  Мавсуф   зикр  намуд, ки  роҳбарони  ҶМЧ  ва  Тоҷикистон тасмим  гирифтаанд, ки тайи  5  соли оянда  ҳаҷми муомилоти  моли  ҳар  ду  кишвар   ба 3  миллиард  доллар  расонида шавад. 
Че  Шаолин  изҳор  дошт, ки  музофоти  Гуандун  дар  намоишгоҳҳои байналмилалии ҶМЧ, ки дар  Тоҷикистон  доир  мешаванд,  иштирок  хоҳад  кард.