Муъминобод: Баррасии Паёми Президент бо аҳли маориф

 Муъминобод, 07.02.2015. (АМИТ «Ховар», Сулаймони Хол).-Вобаста ба Паёми Президенти мамлакат ба Маҷлиси Олии ҶТ дар ноҳияи Муъминобод вохӯрии роҳбарияти ноҳия ва кормандони шуъбаи маориф бо хатмкунандагону омӯзгорон доир гардид. Дар вохӯрӣ зикр шуд, ки Президенти мамлакат дар Паёми навбатии хеш нисбат ба соҳаи маориф, хусусан низоми нави дохилшавӣ ба мактабҳои олӣ сухан гуфта, изҳор кард, ки дар ин зинаи таҳсилот таълими фанҳои табииву риёзӣ ба беҳбудии ҷиддӣ ниёз дорад ва масъулини Вазорати маориф ва илм, роҳбарону масъулини муассисаҳои таълимиро зарур аст, ки доир ба ин масъала тадбирҳои муассир андешанд ва ба хонандагон дар бобати интихоби дурусти касбу ҳунар, аз ҷумла ихтисосҳои муҳандисӣ ва техникиву технологӣ, ки барои иқтисоди миллии мо хеле муҳиманд, ёрии амалӣ расонанд. Тавре  ки Саъдулло Раҳимов, мудири шуъбаи маорифи ноҳияи  Муъминобод  иброз дошт, дар семинари омӯзишӣ, ки мавзӯи асосии он тарзи супоридани имтиҳонҳо ба тариқи тестӣ интихоб гардида буд, ба хатмкунандагон роҳнамои довталаб пешниҳод шуд.