Насби воситаҳои техникӣ дар таваққуфгоҳҳои Хуҷанд

Душанбе, 19.02.2015. (АМИТ «Ховар», Мавҷуда Анварӣ).- Минбаъд пардохти маблағи таваққуфгоҳҳо дар маркази вилояти Суғд-шаҳри Хуҷанд аз тариқи корти пластикӣ сурат мегирад. 
Дар ин бора раиси шаҳри Хуҷанд Раҷаббой Аҳмадзода дастур додаст. Пешбинӣ гаштааст, ки бо ин мақсад дар таваққуфгоҳҳое, ки марказҳои савдои мавзеи «Панҷшанбе» ҷойгиранд, нахустин воситаҳои техникии махсус насб мешаванд.
Ҳадаф аз роҳандозӣ шудани ин тадбир мутамарказонидани сарчашмаи даромад аз ин ҳисоб ва таъмини шаффофияти воридоти маблағҳои аз ин ҳисоб ҷамъшаванда аст.
Тибқи қарори шаҳрдорӣ маблағҳои ба суратҳисоби буҷаи маҳаллӣ воридшуда барои таъмири роҳҳои шаҳр сарф хоҳанд шуд. Насби воситаҳои техникӣ дар тамоми таваққуфгоҳҳои шаҳри Хуҷанд пешбинӣ гаштааст.