Нигоҳе ба исломи сиёсӣ ва ҷаҳони кунунӣ

Душанбе, 23.02.2015. (АМИТ «Ховар», Раъно Нусратуллозода).- Бо ташаббуси садорати факултаи молия ва қарзи Донишкадаи молия ва иқтисоди Тоҷикистон (ДМИТ) 20 феврал  дар мавзӯи «Омилҳои шомилшавии ҷавонон ба гурӯҳҳои ифротгаро: исломи сиёсӣ ва ҷаҳони кунунӣ» бо иштироки доираи васеи устодону донишҷӯён семинари илмӣ-амалии донишкадавӣ доир гардид. Мақсади он дар амал татбиқ намудани дастуру супоришҳои Президенти Ҷумҳурии Тоҷикистон Эмомалӣ Раҳмон дар Паёми навбатии худ ба Маҷлиси Олии Ҷумҳурии Тоҷикистон аст. 
Тавре ки котиби ДМИТ Машҳура Абдуллоева иттилоъ дод, дар семинар сардори шуъбаи корҳои илмӣ-тадқиқотӣ Қутбиддин Муқимов гуфт, ки яке аз масъалаҳои доғи ҷаҳони имрӯза, ки оламиёнро ба ташвиш овардааст, ин реша давондани терроризм ва ифротгароӣ мебошад. Декани факултаи молия ва қарз Шукрулло Хайров дар мавзӯи «Омилҳои шомилшавии ҷавонон ба гурӯҳҳои ифротгаро: исломи сиёсӣ ва ҷаҳони кунунӣ» гуфт, ки яке аз масъалаҳои ҷиддӣ ва ташвишовар ин зиддияти гурӯҳҳои ифротгарои қавмӣ ва мазҳабӣ мебошад, ки имрӯз бисёр давлатҳои ҷаҳон, аз ҷумла давлатҳоеро, ки аксари аҳолиашон мусулмонанд, ба ташвиш овардааст. Бинобар ин, моро лозим аст, ки дар зеҳни ҷавонони имрӯза андешаҳои солим, аз қабили эҳтиром гузоштан ба арзишҳои миллӣ, ватандӯстӣ ва ба қадри оромию осудагии давлати соҳибистиқлоламон расиданро бипарварем.