Омодагиҳо ба интихоботи парлумонии Тоҷикистон дар Эрон

Душанбе, 23.02.2015 (АМИТ “Ховар”).- Интихоботи парлумонии Тоҷикистон дар Ҷумҳурии Исломии Эрон дар сатҳи баланд баргузор хоҳад шуд. Дар ин бора аз Сафорати Ҷумҳурии Тоҷикистон дар Теҳрон хабар доданд. Назар ба гуфтаи масъулони сафорат, ҳамаи шаҳрвандони тоҷики муқими Эрон бо қонуну муқаррарот ва замону макони баргузории интихобот шинос шудаанд ва кормандони сафорат ҷиҳати ошноии амиқи онҳо ба Машҳад, Гургон, Қум, Зоҳидон, Исфаҳон, Шероз ва дигар шаҳру устонҳои Эрон сафар намуда, бо шаҳрвандони Тоҷикистон аз наздик дидору гуфтугӯ намудаанд.
Аз ҳоло сандуқҳои раъйдиҳӣ, варақаҳо ва таблиғоти лозим дар Сафорати Тоҷикистон дар Теҳрон, ки танҳо макони овоздиҳии шаҳрвандони Тоҷикистон муқаррар шудааст, омода шуда, дар матбуот ва расонаҳои Эрон, аз ҷумла ИРАС- дафтари мутолиоти Эрон ва АвруОсиё (www.iras.ir), Титри ахбор(www.titreakhbar.com) дар ин бора матолиб мунташир шудаанд.
Қарор аст шаҳрвандони тоҷики муқими Эрон аз соати 8 — и субҳ то соати 20 — и рӯзи 1 март дар бинои Сафорати Тоҷикистон дар Теҳрон, воқеъ дар Ниёварон, аввали Кошонак, хиёбони шаҳид Зайналӣ, кӯчаи сеюм, блоки 10 овоздиҳии худро ба номзади мавриди назарашон анҷом диҳанд.