Шарҳи Паём дар Вазорати меҳнат, муҳоҷират ва шуғли аҳолӣ

Душанбе, 14.02.2015. (АМИТ «Ховар», Мавҷуда Анварӣ).- Дар Вазорати меҳнат, муҳоҷират ва шуғли аҳолии Ҷумҳурии Тоҷикистон оид ба шарҳи Паёми Президенти Тоҷикистон ба Маҷлиси Олии Ҷумҳурии Тоҷикистон барои соли 2015 машварат баргузор гардид. Дар семинар муовини вазир Н. Маҳмадуллоев  иброз дошт: «Паёми Президентро метавон дурнамои фаъолияти сохторҳои ҳукумат ва зиндагии мардум номид». 
Инчунин ӯ ба як силсила масъалаҳое, ки дар Паёми имсола ироа гардида ва бевосита ба фаъолияти вазорат мансуб мебошанд, аз ҷумла таъсиси ҷойҳои нави корӣ, омӯзиши касбу ҳунарҳои ҷавобгӯ ба талаботи бозори меҳнат ва забономӯзии шаҳрвандон дар литсейҳои касбӣ-техникӣ, марказҳои таълими калонсолон ва танзими масъалаҳои вобаста ба муҳоҷирати меҳнатӣ, ки аз ҳадафҳои асосии Ҳукумат ва роҳбарони мақомоти иҷроияи ҳокимияти давлатии вилоятҳо ва шаҳру ноҳияҳо мебошанд, диққати иштирокчиёнро равона сохт.