“Шерчангол” боз ба хонаи аслиаш бармегардад

Душанбе, 11.02.2015 (АМИТ «Ховар», Мавҷуда Анварӣ).-  Кормандони Раёсати Агентии назорати маводи нашъаовар дар вилояти Хатлон бо гумони ғайриқонунӣ нигоҳ доштани силоҳи оташфишон сокини 52-солаи ноҳияи Бохтарро бо тахаллуси “Шерчангол”, ки соли 2000 аз рӯи якчанд моддаҳои Кодекси ҷиноятии ҶТ ба муҳлати 15 сол маҳкум шуда буд, дастгир намуданд. Ҳангоми дастгир намудан аз ӯ як адад туфангчаи Макарови коршоям бо як тирдон дарёфт гардид. 
Маврид ба зикр аст, ки «Шерчангол» баъди аз маҳбасхона озод шудан ба ҷойи шукргузорӣ аз озодӣ, баръакс ҳанӯз ҳам даст ба ҳаракатҳои зиддиқонунӣ мезанад. 
Илова бар ин ҳангоми кофтукови шахсӣ аз ӯ халтаи селофанӣ бо маводи ҳашиш ошкор ва мусодира гардид.
Баъдан кормандони фаврӣ ба ноҳияи Бохтар рафта, дар хонаи дастгиршуда аз дохили бухории барқӣ боз як халта маводи афюн, ки вазни он қариб ним килограммро ташкил медод, ошкор карданд.
Аз рӯи ҳодисаи мазкур парвандаи ҷиноӣ оғоз гардидааст.