Суғд: ҳалокати 26 нафар зимни садамаҳои нақлиётӣ

Хуҷанд, 13.02.2015. (АМИТ «Ховар»,Абдуаҳад Шарифзода).-Содиршавии ҳодисаҳои роҳу нақлиётӣ дар роҳҳои нақлиётгарди ҳудуди вилояти Суғд бо иштироки ронандагон ва иштирокчиёни ҳаракати роҳ аз аввали сол инҷониб афзудааст.
Тавре ки ба АМИТ «Ховар» аз маркази матбуоти шуъбаи Бозрасии давлатии автомобилии вилояти Суғд  иттилоъ доданд, чанде қабл дар ҳудуди ноҳияи Спитамен дар натиҷаи садамаи нақлиётӣ бо айби ронандаи мошини мусофиркаш, ки дар натиҷаи идора карда натавонистани нақлиёт ба самти муқобили роҳ баромада, ба мошини Камаз бармехӯрад, ки дар натича 4 нафар мусофири мошини Газел ҷароҳати гуногуни ҷисмонӣ бардошт. Дар айни замон ҷароҳатбардоштагон зери назорати духтурони беморхонаи марказии ноҳиявӣ қарор доранд.
Дар маҷмӯъ, дар давоми 1 моҳу  10 рӯзи  соли ҷорӣ дар роҳҳои мошингарди қаламрави вилоят 38 ҳодисаи роҳу нақлиётӣ ба қайд гирифта шуд, ки бар асари он 26 кас ҳалок гардида, 47 нафар  ҷароҳати гуногуни ҷисмонӣ бардошт.